Bir neçə ay bundan öncə oğlumla Avropaya səyahət etdik. Bu əsrarəngiz səfərin ən maraqlı anını paylaşmağın düşünürəm ki, vaxtı indidir.
Füsunkar Romada tarixi yerləri ziyarət etdikdən sonra daha rahat çanta almaq üçün bir dükana girdik. Dükan mərkəzi küçələrdən birində yerləşirdi. Dükanda bir xeyli götür-qoy etdik. Satıcı oğlan bizdən haradan olduğumuzu soruşdu. Azərbaycandan olduğumuzu deyəndə onun gözlərindəki işıq oğlumla məni çox təəccübləndirdi.
Bunu eşidər-eşitməz çox da səlis olmayan ingilis dilində "Ooo, İlham Əliyev, Qarabağ, qələbə" sözləri ilə söhbətə başlayan bu qarabuğdayı oğlandan biz də çox böyük rəğbətlə haradan olduğunu soruşduq. Banqladeşdən olan bu cavan oğlan bizim 44 günlük müharibənin bütün gedişatından, Azərbaycanın qələbəsinin əzəmətindən, Ermənistana antipatiyasından, Cənab Ali Baş Komandan İlham Əliyevin bir Prezident kimi, dövlət başçısı kimi əvəzolunmaz insan olduğundan danışdı. Və hiss olunurdu ki, bu banqladeşli oğlanın tarixdən və siyasətdən yaxşı başı çıxır. Söhbətimiz o qədər şirin idi ki, artıq çantanın yarayıb-yaramadığına məhəl qoymadan onu aldıq.
Böyük qürur və fəxr hissi ilə oranı tərk elədik. Vətəndən minlərlə kilometr uzaqda, Avropanın mərkəzində, adi bir banqladeşlinin Azərbaycan haqda bu qədər bilgisi çox gözəl hiss idi. Əlbəttə ki, bütün bunlar bütöv Azərbaycanı yumruq kimi birləşdirən, dəmir yumruğu ilə "Qarabağ Azərbaycandır" ifadəsini nidaya çevirən cənab Prezident İlham Əliyevin düzgün siyasəti sayəsindədir. Yenidən Vətənimizə, dövlətimizə, xalqımıza rəhbərliyinin yeni dönəmində əziz Prezidentimizə uğurlar arzulayırıq. Yaddaşımdan çıxmayan bu duyğulu xatirə Prezidentimizin andiçmə mərasimindəki çıxışı zamanı bir daha gözümün önündə canlandı. Ürəyimdən Tanrıya ünvanladığım belə bir cümlə keçdi: Əlinizi üzərinə qoyub and içdiyiniz müqəddəs kitab “Qurani-Kərim” bu müqəddəs yolda Sizə yar olsun, Cənab Prezident!
Aytəkin Nəsirova