Bu gün futbol üzrə Misli Premyer Liqasında sonuncu - XXXVI tura start veriləcək.

AZƏRTAC xəbər verir ki, günün yeganə qarşılaşmasında "Sumqayıt" "Səbail"in qonağı olacaq.

“ASCO Arena”da təşkil olunacaq görüş saat 19:30-da başlayacaq.

Oyunun baş hakimi Rəşad Əhmədov olacaq.

Matç aktivində 22 xalla turnir cədvəlinin sonuncu - onuncu pilləsində yer alan "Səbail" üçün formal xarakter daşıyacaq. Paytaxt təmsilçisinin I Liqaya düşəcəyi dəqiqləşib. Sumqayıt klubu isə 30 xalla doqquzuncu sırada qərarlaşıb.