Astanada şəhər kafelərindən birində yemək qəbulundan sonra bağırsaq infeksiyasına kütləvi yoluxma halı qeydə alınıb.
AZƏRTAC “Kazinform”a istinadla xəbər verir ki, zərərçəkənlərin sayı 20 nəfər təşkil edir, onlardan 11-i uşaqdır. Faktla bağlı ictimai iaşə obyektində araşdırma başlanıb.
“Qida məhsulundan nümunə laboratoriyaya göndərilib, ətraf mühitdən nümunələr götürülüb, şəxsi heyət müayinədən keçirilib. Araşdırma və epidemiya əleyhinə tədbirlər davam etdirilir”, – deyə Astana şəhərinin Sanitar-Epidemioloji Nəzarət Departamentinin sədr müavini Janna Praliyeva bildirib.
Həmçinin hadisə ilə bağlı polis idarəsi tərəfindən ilkin istintaqa başlanılıb.