Aprelin 20-21-də Mirzə Fətəli Axundov adına Milli Kitabxanada “Bakı İslam mədəniyyətinin paytaxtı - 2009” tədbirləri çərçivəsində İqtisadi Əməkdaşlıq Təşkilatına (İƏT) üzv ölkələrin Milli Kitabxana Direktorları Şurasının II konfransı keçiriləcək.
Milli Kitabxanadan verilən məlumata görə, konfrans Türkiyə, İran, Pakistan, Türkmənistan, Tacikistan, özbəkistan, Qazaxıstan və Qırğızıstanın milli kitabxana direktorlarının və İƏT-in Mədəniyyət İnstitutunun iştirakı ilə keçiriləcək. Konfransın mövzusu isə milli kitabxanaların qloballaşan dünyada informasiya cəmiyyətinin tələblərinə uyğun şəkildə təşkili və qarşılıqlı əlaqələrin inkişafından ibarət olacaq.
Xatırladaq ki, İƏT-ə üzv olan ölkələrin Milli Kitabxana Direktorları Şurasının I konfransı iki il öncə Tehranda keçirilib.