Noyabrın 7-də Milli İncəsənət Muzeyində Türkiyə səfirliyinin, “Nargis” jurnalının və “Palmali” şirkətlər qrupunun dəstəyi ilə Yunus Əmrə Türk Mədəniyyət Mərkəzi tərəfindən ebru sənətinə (su üzərində rəsmin kağıza köçürülməsi) aid sərgi açılıb.
AzərTAc xəbər verir ki, açılış mərasimində Türkiyənin Azərbaycandakı səfiri İsmail Alper Coşkun sərginin əhəmiyyətindən danışıb. Bildirib ki, hər iki ölkə zəngin mədəniyyət tarixinə malikdir. Diqqətə çatdırıb ki, sərgini təşkil etməkdə məqsəd Türkiyənin ebru sənətini və sərgidən sonra təqdim olunacaq muğam sənətini bir araya gətirmək olub. Səfir İsmail Alper Coşkun mərasimin təşkilatçılarına dərin təşəkkürünü bildirib.
Sonra mərasim iştirakçıları sərgiyə baxıblar.
Tədbir Canəli Əkbərovun ifasında konsertlə davam edib.
Sonda tədbirin təşkilatçılarına Türkiyə səfirliyinin hədiyyələri təqdim edilib.
Türkiyənin ebru sənətinə aid 3 rəssamın 37 işinin nümayiş olunduğu sərgi noyabrın 17-dək davam edəcək.