Cəbrayıl Əməliyyatı: Vətən Müharibəsinin Həlledici Dönüş Nöqtəsi və Qələbə Müjdəsi

Bakı:

23 °C

78 %

5 m/s

Əlaqə

AZ RU EN

Ana səhifə / YAP xəbərləri / Cəbrayıl Əməliyyatı: Vətən Müharibəsinin Həlledici Dönüş Nöqtəsi və Qələbə Müjdəsi

Cəbrayıl Əməliyyatı: Vətən Müharibəsinin Həlledici Dönüş Nöqtəsi və Qələbə Müjdəsi

02.10.2026 [17:10]

2020-ci ilin payızında baş verən 44 günlük Vətən müharibəsi Azərbaycanın
hərbi tarixinə şanlı səhifələr yazdı. Bu müharibənin gedişatını kökündən
dəyişən, düşmənin müqavimət gücünü qıran və cəbhədə strateji üstünlüyü
tamamilə Azərbaycan Ordusunun tərəfinə keçirən ən həlledici mərhələlərdən
biri məhz Cəbrayıl əməliyyatı oldu. Cəbrayılın azad edilməsi təkcə bir rayonun
işğaldan qurtarılması deyil, bütün cənub cəbhəsinin taleyini həll edən möhtəşəm
hərbi zəfər idi.
Cəbrayıl rayonu coğrafi və hərbi baxımdan son dərəcə mürəkkəb bir ərazi idi.
Ermənistan Silahlı Qüvvələri 27 illik işğal dövründə burada bir neçə dərinlikdən
ibarət, beton istehkamlarla, minatəmizləmə baryerləri və tank əleyhinə
xəndəklərlə möhkəmləndirilmiş müdafiə sədləri qurmuşdu. Hərbi ədəbiyyatda
"Ohanyan xətti" kimi tanınan bu müdafiə sistemi düşmən tərəfindən keçilməz
hesab olunurdu. Arazboyu düzənlikləri və cənub istiqamətindəki hakim
yüksəklikləri nəzarətdə saxlayan bu mövqelər Azərbaycan əsgəri üçün ciddi
relyef çətinlikləri yaradırdı. Bu cür mürəkkəb istehkamları yarmaq hərbi
heyətdən böyük qəhrəmanlıq, fədakarlıq və yüksək peşəkarlıq tələb edirdi.
Azərbaycan Silahlı Qüvvələrinin dəqiq planlaşdırılmış taktikası və şəxsi heyətin
misilsiz fədakarlığı nəticəsində düşmənin illərlə güvəndiyi bu istehkamlar qısa
müddətdə darmadağın edildi. Müzəffər Ali Baş Komandan İlham Əliyevin
rəhbərliyi ilə həyata keçirilən bu əməliyyatda ordumuz düşmənin ön müdafiə
həddini yararaq onları mənəvi-psixoloji sarsıntıya uğratdı və Ermənistan
ordusunda kütləvi fərariliyə yol açdı.
Cəbrayıl şəhərinin və rayonun kəndlərinin azad olunması Vətən müharibəsində
tam mənası ilə dönüş nöqtəsi oldu. Cəbrayıl azad edildikdən sonra Azərbaycan
Ordusu üçün o vaxt işğal altında olan digər rayonlara uğurlu əks-hücum
əməliyyatları keçirmək imkanı yarandı. Xüsusilə, Xocavənd rayonunun cənub
kəndləri və strateji hərbi əhəmiyyətə malik Hadrut qəsəbəsi istiqamətində
genişmiqyaslı əməliyyatların aparılması üçün əlverişli şərait formalaşdı.
Bunun məntiqi davamı olaraq, Arazboyu istiqamətdə sürətli irəliləyiş təmin
edildi, Zəngilan, ondan sonra Qubadlı və Laçın rayonunun cənub hissəsi
işğalçılardan azad olundu. Eyni zamanda, tarixi Xudafərin körpüsü azad
edilərək dövlət sərhədimiz bərpa olundu və Laçın dəhlizi Azərbaycan
Ordusunun tam nəzarətinə götürüldü. Bu həlledici gedişlər düşmənin
Ermənistanla təchizat əlaqələrini kəsməyə və Şuşa zəfərinə gedən yolu açmağa
imkan verdi.

2020-ci il oktyabrın 4-də Cəbrayıl şəhərinin azad edilməsi Vətən müharibəsində
azad olunan ilk rayon mərkəzi kimi tariximizə qızıl hərflərlə yazıldı. Prezident
İlham Əliyevin müvafiq sərəncamları ilə bu tarixi gün "Cəbrayıl Şəhəri Günü"
kimi təsis olundu və əməliyyatda rəşadət göstərən minlərlə hərbi qulluqçu
"Cəbrayılın azad olunmasına görə" medalı ilə təltif edildi. Yekun olaraq,
Cəbrayıl əməliyyatı düşmənin hərbi oxunun qırıldığı, növbəti böyük qələbələrin
tramplininə çevrilən və Azərbaycan dövlətinin hərbi qüdrətini nümayiş etdirən
şanlı bir dastan oldu.
Asiman Babayev
YAP Şahbuz rayon təşkilatının məsləhətçisi

Paylaş:

Baxılıb: 150 dəfə