Heydər Əliyev
yeni azerbaycan logo

Ana səhifə / Xəbər lenti / Türkiyə İranın məkrli planlarını əldə edib

Türkiyə İranın məkrli planlarını əldə edib

15.10.2021 [10:51]

İran casus şəbəkəsinin fəaliyyəti araşdırılır

Türkiyənin Milli Kəşfiyyat Təşkilatı (MİT) polislə birlikdə ölkənin şərqindəki Van əyalətində əməliyyat keçirib. Əməliyyat zamanı səkkiz nəfər, o cümlədən İranın xüsusi xidmət orqanlarının iki casusu saxlanılıb. Bildirilir ki, qrup üzvləri keçmiş İran hərbçisini qaçaqmalçılıq yolu ilə İrana aparmaq istəyərkən ələ keçirilib.

Türkiyə xüsusi xidmət orqanlarının bu əməliyyatı regiondakı məlum “İran problemi”nin artıq pik həddə çatmasından xəbər verir. Belə ki, regionda İranın “casus şəbəkələri” saxlaması birmənalı qarşılana bilməz. Eyni zamanda, Türkiyə MİT-nin bu əməliyyatının məhz indiki dövrə təsadüf etməsi də bir sıra suallar yaradır. Qonşularına, konkret olaraq, Azərbaycana və Türkiyəyə qarşı əsassız bəyanatlar, hətta təhdidlər səsləndirən rəsmi Tehranın casuslarının ifşa edilməsinin arxasında siyasi mahiyyət varmı? Ekspertlərin fikrincə, MİT-in sözügedən əməliyyatı keçirməsi İrana mühüm mesajdır.

Milli Məclisin Müdafiə, təhlükəsizlik və korrupsiya ilə mübarizə komitəsinin üzvü, deputat Arzu Nağıyevin fikrincə, son dövrlərdə İran da daxil olmaqla, bəzi dövlətlər müəyyən casusların və ya qruplaşmaların fərqli strukturlarda yerləşməsi istiqamətində addımlar atıb. Bu, gələcəkdə həm də nəzarət qrupunun yaradılmasına xidmət göstərir. Millət vəkili qeyd edib ki, Türkiyə MİT-nin apardığı əməliyyat isə əvvəlcədən hazırlanıb: “Sözügedən casus şəbəkəsinin ifşası, sadəcə bu günə təsadüf etdi. Qeyd edim ki, hadisə Türkiyə ilə İran arasında bu istiqamətdə ilk “toqquşma” deyil. İstər İraqda, istər Suriyada, istərsə də digər regionlarda Türkiyənin apardığı kəşfiyyat işlərində bu tip məlumatlar yer almaqdadır. Görünür ki, vəziyyət ciddiləşib və son nəticə olaraq böyük bir casus şəbəkəsinin zərərsizləşdirilməsi həyata keçirilib”.

A.Nağıyev onu da qeyd edib ki, bu məsələ yalnız “kəşfiyyat” məsələsi olmaya da bilər. Yəni, bu əməliyyatın “siyasi səbəbləri”nin mövcudluğu da istisna edilmir: “İranın son davranışları bu məsələnin siyasi səbəbi ola bilər. Çünki xüsusi xidmət orqanları da koordinasiyalı işləyir. Lakin məsələyə yalnız birtərəfli yanaşma düzgün deyil. Hər bir halda zərərsizləşdirilən şəbəkənin fəaliyyəti araşdırılacaq”.

Azərbaycan Demokrat Partiyasının (ADP) sədri Sərdar Cəlaloğlu isə baş verənlərin İranın son vaxtlar nümayiş etdirdiyi davranışdan qaynaqlandığını düşünür. ADP sədri həmin casusların uzun müddət nəzarət altında olduğuna əminliyini ifadə edib: “Bu şəbəkənin üzərində yəqin ki, nəzarət mexanizmi çoxdan mövcud olub. Adətən, dövlətlər bu cür şəbəkələri müəyyən xüsusi hallarda ifşa edirlər. İranın açıq-aydın anti-Türkiyə, anti-Azərbaycan siyasəti aparması, Ermənistanı dəstəkləməsi bu şəbəkənin ifşasını zəruriləşdirib. Bu, İranın anti-Türk siyasətinə cavabdır. Yəqin ki, yaxın zamanda Türkiyə-İran münasibətlərinin daha da gərginləşəcəyinin şahidi olacağıq. Çünki həmin şəbəkənin hansı fəaliyyətlə məşğul olması üzə çıxacaq və Türkiyə də lazımi məqamda bu faktlardan istifadə edəcək”.

ADP sədrinin sözlərinə görə, II Qarabağ müharibəsi bir sıra qlobal nəticələr yaradıb. Bu nəticələr Türk birliyinin yaranması və İslam dünyasının bir araya gəlməsidir. Bu nəticələrin reallaşmasına əsas maneə isə İrandır. “Cənubi Azərbaycan İranın tərkibindədir. O cümlədən, üzü Firdovsidən bu yana İran hər zaman Türk birliyinə qarşı düşmənçilik sərgiləyib.  Eləcə də, İranın şiə xilafəti yaratmaq istəyi İslam dünyasını parçalayır. Bu gün İslam ölkələrinin hər birində gedən müharibədə İran “tərəf” kimi çıxış edir. Bu ölkə İslam dünyasının parçalanmasında müstəsna rol oynayır, öz maraqları üçün ikinci bir “İslam dünyası” yaratmaq istəyir. Beləliklə, dini də parçalayır, İslam dünyasını da zəiflədir. Türkiyə keçirdiyi əməliyyatla həm də mesaj verir. Türk kəşfiyyatı dünyanın ən öndə gedən kəşfiyyatıdır”, deyən S.Cəlaloğlu bildirib ki, Türkiyənin əlində İranın və digər ölkələrin Türk dünyasına qarşı planları ilə bağlı məlumatlar var: “Yəqin ki, Türkiyə bu addımı ilə həmin planlara qarşı lazımi tədbirlərin görüləcəyini bildirir”.

Pərviz Sadayoğlu

 

 

 

Paylaş
Baxılıb: 105 dəfə

Xəbər lenti

Hamısına bax
ARXİV
B Be Ça Ç Ca C Ş
1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30 31