Mədəni irsi qorumaq və gələcək nəsillərə ötürmək borcumuzdur

Bakı:

10°C

81%

3m/s

Əlaqə

AZ RU EN

Ana səhifə / Arxiv / Mədəni irsi qorumaq və gələcək nəsillərə ötürmək borcumuzdur

Mədəni irsi qorumaq və gələcək nəsillərə ötürmək borcumuzdur

07.10.2024 [18:02]

Rövşən Əhmədov

YAP Ağcabədi rayon təşkilatının sədri

Cari ilin 30 sentyabr tarixində Bakıda Azərbaycan aşıq yaradıcılığının görkəmli nümayəndəsi, böyük el sənətkarı Aşıq Ələsgərin abidəsinin ucaldılması Azərbaycan Respublikasının Prezidenti cənab İlham Əliyevin böyük ustadın anadan olmasının 200 illik yubileyinin dövlət səviyyəsində keçirilməsi barədə Sərəncamının icrası olaraq həyata keçirilmişdir. Bu sərəncam dövlət başçımızın həm Aşıq Ələsgər şəxsiyyətinə, həm də milli kimliyimizin ünvanlarından biri olan aşıq sənətinə diqqət və qayğısının ifadəsidir. Açılış zamanı çıxış edən cənab Prezident İlham Əliyev qeyd etdi ki, üç il əvvəl iki sərəncam imzalamışdır. Bir sərəncam əsasında Aşıq Ələsgərin 200 illik yubileyi dövlət səviyyəsində qeyd edilmişdir. İkinci sərəncamda isə sənətkarın abidəsinin ucaldılması qeyd edilirdi.

Ölkə Prezidenti çıxışı edərkən Göyçə mahalından olan Aşıq Ələsgərin erməni vəhşiliyi nəticəsində doğma torpaqlarından didərgin salınması, Aşıq Ələsgərin vətəninə olan sevgi və həsrəti, Heydər Əliyevin təşəbbüsü ilə sənətkarın 150 illiyinə həsr edilmiş abidənin ermənilər tərəfindən dağıdılması kimi mövzulara toxunmuşdur. “Qərbi Azərbaycanlı vətəndaşlarımız da qayıdışın sevincini yaşayacaq. Suverenliyimizin tam bərpa olunması Qərbi azərbaycanlılarda da nikbinlik hissini, ümidləri daha da artırmışdır”,-deyə Prezident İlham Əliyev bildirib.

Aşıq Ələsgərin abidəsinin ucaldılmasının xüsusi bir əhəmiyyəti də böyük saz-söz ustadının doğulub-böyüdüyü, yazıb-yaratdığı Göyçə mahalının və bütünlüklə tarixi Azərbaycan torpaqları olan Qərbi Azərbaycanın işğal altında olması və Qərbi Azərbaycandan olan soydaşlarımızın 35 ildən artıqdır ki, Ermənistanın etnik təmizləmə siyasəti nəticəsində qaçqın düşüb ata-baba yurdlarının həsrəti ilə yaşamasıdır. Məhz heykəlin açılışındakı nitqində Ölkə başçısı cənab İlham Əliyevin "Gün gələcək biz Aşıq Ələsgərin ermənilər tərəfindən dağıdılmış abidəsini bərpa edəcəyik və Ağkilsə kəndində buna oxşar mərasim keçirəcəyik" - sözləri böyük strateji hədəflərə ünvanlanmış tarixi mesajdır. Bir sözlə, Aşıq Ələsgərin abidəsinin ucaldılması Qərbi Azərbaycana, Göyçəyə, Ağkilsəyə qayıdışımıza inamımızın təcəssümüdür.

Bu abidənin açılışı eyni zamanda strateji bir məna da daşıyırdı. Prezident İlham Əliyev, Aşıq Ələsgərin abidəsinin açılmasının yalnız mədəniyyət sahəsində deyil, həm də milli həmrəyliyi gücləndirmək, Azərbaycan xalqının tarix və mədəniyyətinə olan bağlılığını ifadə etmək üçün vacib olduğunu bildirdi. Bu, xüsusilə, Azərbaycanın Qərbi Azərbaycan torpaqlarında yaşayan və tarixən bu bölgədə öz mədəniyyətini yaşatmış insanların irsinin silinməsinə yönəlmiş cəhdlərə qarşı bir cavabdır.

Aşıq Ələsgərin yaradıcılığı Azərbaycan xalqının ürəyində böyük bir iz buraxmışdır ki, 200 il keçəndən sonra yenə də o, görkəmli şəxsiyyət, vətənpərvər insan, öz xalqını, Vətənini sevən insan kimi xalqımızın yaddaşında yer tutub.

Qeyd edək ki, bu abidənin açılışı təkcə Aşıq Ələsgərin xatirəsini yaşatmağın deyil, həm də milli kimliyin, mədəni irsin qorunmasının və gələcək nəsillərə ötürülməsinin nə dərəcədə əhəmiyyətli olmasını göstərir.

Paylaş:

Baxılıb: 213 dəfə