Dünya ölkələrində olduğu kimi, Azərbaycanda da yeni növ koronavirus (COVID-19) infeksiyası ilə mübarizə davam edir. Mütəxəssislərin qeyd etdikləri kimi, əsas məsələ hər bir fərdin məsuliyyətli olması və bütün qaydalara ciddi əməl etməsidir.

Məsələ ilə bağlı qəzetimizə açıqlama verən həkim-infeksionist Sevil Məmmədova bildirib ki, dəhşətli kabus kimi dünyanı dolaşan COVID-19 infeksiyası bəşəriyyət üçün təhlükə mənbəyi olaraq qalır. Onun sözlərinə görə, təəssüf ki, virusdan qorunmaq üçün sadə gigiyenik qaydalara əməl etmək lazımdır: "Bunlar isə hamıya yaxşı məlum olan sosial məsafənin gözlənilməsindən, tibbi maskadan düzgün istifadədən, respirator gigiyena qaydalarına riayət etməkdən – asqırdıqda və öskürdükdə ağızın dəsmal və ya dirsək bükümü ilə örtülməsindən ibarətdir".

Mütəxəssis bildirib ki, bu xəstəliyi yüngül keçirənlər ev şəraitində müalicə oluna bilərlər: "Simptomlar müşahidə olunan kimi evdə qalmaq, özünü təcrid etmək, ərazi üzrə sahə həkimi ilə əlaqə saxlamaq və yalnız həkimin məsləhəti ilə evdə müalicəyə başlamaq lazımdır. Ev şəraitində müalicə yalnız həkim tövsiyəsi ilə aparılmalıdır. Boğazı ağrıyan, qızdırması, öskürəyi və respirator əlamətləri olanlar yüngül xəstələr sayılırlar, lakin onlarda sətəlcəm inkişaf etməyib. Adətən, xəstəliyin birinci həftəsində həmin simptomlar müşahidə olunur, yoluxma baş veribsə, artıq ikinci həftədən etibarən virus aşağı tənəffüs yollarına keçir və ağciyəri zədələyir. İlkin simptomlarla üzləşən, yaşı 65-dən aşağı və heç bir xroniki xəstəliyi olmayanlar evdə müalicə ala bilərlər".

Onun sözlərinə görə, bəzən elə olur ki, yoluxma baş versə də, simptomlar müşahidə olunmur və ya az müşahidə edilir, lakin belələri yenə də virus daşıyıcısıdır və başqalarını yoluxdura bilərlər: "Elə xəstələr olur ki, onların spesifik qan analizlərində nə vaxtsa virusa yoluxduqları görünür, lakin heç bir əlamət hiss etmədiklərini bildirirlər. Nəzərə almaq lazımdır ki, virus göstəricisi kimi xəstələnmə bir variantdır və aysberqin görünən hissəsidir, adətən yoluxanlarda az simptomlar və ya simptomsuz hal müşahidə olunur. Buna görə də gigiyenik qaydalara düzgün əməl etmək, az simptom müşahidə olunan hallarda belə özünü təcrid etmək lazımdır".

MÜŞFİQƏ