26 iyul 2019-cu il tarixində Zərdab rayonunda yay baramasının təhvilinə başlanılması ilə əlaqədar tədbir keçirilib. Tədbirdə rayon rəhbərliyi, Kənd Təsərrüfatı Nazirliyinin məsul işçiləri, mütəxəssislər, kümçülər, rayon ictimaiyyətinin nümayəndələri iştirak ediblər.
Tədbiri giriş sözü ilə Zərdab rayon İcra Hakimiyyətinin başçısı Lütvəli Babayev açıb. Bildirilib ki, Prezident İlham Əliyevin 2017-ci il 27 noyabr tarixli Sərəncamı ilə təsdiq edilmiş “Azərbaycan Respublikasında baramaçılığın və ipəkçiliyin inkişafına dair 2018-2025-ci illər üzrə Dövlət Proqramı”nın icrası istiqamətində rayonda həyata keçirilən tədbirlər nəticəsində baramaçılıq sahəsində yüksək nəticələr əldə edilib. 2016-cı ildə 5710 kq barama tədarük olunduğu halda, 2019-cu ildə bu göstərici 11,4 dəfə artaraq 65 ton 321 kq-a çatıb, 4 minə yaxın əhali mövsümi işlə təmin edilib. Barama tədarükü sahəsində son üç ildə Zərdab rayonu respublika üzrə ən yüksək göstəricilərə nail olub. Müvafiq Dövlət proqramının icrasının təmin olunması istiqamətində Zərdab rayonunda innovativ tədbirlərin həyata keçirilməsinə, o cümlədən “Zərdab baramaçıları” Assosiasiyasının yaradılması istiqamətində işlərə başlanılıb, baramaçılığın və ipəkçiliyin inkişafı üçün geniş infrastruktur tədbirlərin həyata keçirilməsi rayonda aqrar klasterin təşkilini aktuallaşdırıb. Rayon ərazisində mövcud yem bazasını və kümçülərin bu sahəyə olan marağını nəzərə alaraq rayon İcra Hakimiyyəti başçısının təşəbbüsü ilə Çin Xalq Respublikasından həmin ölkənin mütəxəssislərinin nəzarəti ilə 300 qutu baramaqurdu gətirilərək Qax Damazlıq Stansiyasında inkubasiya olunub, bu il iyunun 26-da rayona gətirilib. Çin Xalq Respublikasından gəlmiş mütəxəssislər və Kənd Təsərrüfatı Nazirliyinin nümayəndəsinin iştirakı ilə rayon İcra Hakimiyyətində “Yay mövsümündə baramaqurdunun yemləməsinin xüsusiyyətləri” mövzusunda kümçülərlə görüş keçirilib, tədbirin sonunda onlara pulsuz olaraq 300 qutu baramaqurdu paylanılıb, min nəfərdən çox qeyri-məşğul əhali mövsümi işlə təmin edilib.
Azərbaycanda ilk dəfə olaraq yay mövsümündə baramaqurdunun saxlanılması Zərdab rayonunda həyata keçirilib, qurdun saxlanma yerində 32-35 dərəcə temperatur olduqda belə bəzi kümçülərin ipəkqurdunun yay yemləməsi 22-ci gün başa çatıb və barama sarıma mərhələsi başlayıb.
Mütəxəssislərin ilkin proqnozlarına görə, ikinci mərhələdə rayon üzrə paylanılmış baramaqurdundan 10 tondan çox məhsul istehsalı gözlənilir. 24 iyul 2019-cu il tarixindən yay baramasının təhvilinə başlanılıb. Təhvilin ilk iki günündə 1 tondan çox barama tədarük edilib.
Kənd Təsərrüfatı Nazirliyinin heyvandarlığın təşkili və monitorinqi şöbəsinin müdiri Esmira Lətifova tədbirdə çıxış edərək kümçüləri yay baramasının təhvilinə başlamaları münasibətilə təbrik edib və baramaçılıq sahəsində qarşıda duran vəzifələrdən danışıb.
Tədbirdə çıxış edən kümçülər baramaçılığın inkişafı istiqamətində həyata keçirilən tədbirlər və onlar üçün yaradılan şəraitə görə ölkə rəhbərliyinə minnətdarlıqlarını bildiriblər.