“Ermənistanın hərbi təyinatı olmayan əraziləri minalaması və həmin ərazilərin xəritələrini təqdim etməməsi hərbi cinayətdir. Belə ki, minalanmış ərazilərin xəritələrinin verilməməsi həm mülki vətəndaşların həlak olmasına, həm də insanların həmin ərazilərə qayıdışını çətinləşdirməyə hesablanıb. Təəssüf ki, xəritələrin verilməməsi beynəlxalq konvensiyaların pozulması olsa da, bununla əlaqədar Ermənistana qarşı dünya ictimaiyyətindən reaksiyaların olduğunu görmürük”.
Bu fikirləri qəzetimizə açıqlamasında Azərbaycan Respublikaçılar Partiyasının sədri Sübut Əsədov deyib.
S.Əsədov deyib ki, bu çətinliklərə baxmayaraq, Azərbaycan dövləti planlı şəkildə azad olunmuş əraziləri minalardan təmizləmək üçün mühüm işlər görür: “Fevralın 26-da Azərbaycan Respublikasının Prezidenti İlham Əliyev yerli və xarici media nümayəndələri üçün təşkil edilən mətbuat konfransında da bu məsələyə toxunub. Belə ki, Prezidentin tapşırığı ilə artıq Müdafiə Nazirliyinin yeni mühəndis-istehkamçı bölmələri formalaşdırılıb. Bununla paralel olaraq dövlət başçısı tərəfindən Minatəmizləmə üzrə Dövlət Agentliyi yaradılıb. Təəssüf ki, minalardan təmizlənməli olan ərazi kifayət qədər böyükdür və Ermənistanın minalanmış ərazilərin xəritələrini verməməsi bu işləri çətinləşdirir”.
Partiya sədrinin sözlərinə görə, işğaldan azad olunmuş ərazilərdə mərhələli şəkildə əsasda quruculuq və bərpa işlərinin reallaşdırılması üçün də ciddi tədbirlər görülür: “Dəfələrlə bəyan edildiyi kimi, Qarabağı regionun ən inkişaf etmiş məkanlardan birinə çevirmək üçün Azərbaycanın kifayət qədər resursu var. Sözügedən mətbuat konfransında dövlət başçısının xüsusi olaraq vurğuladığı kimi, Böyük Qayıdışın həyata keçirilməsi üçün bütün işlər Azərbaycanın öz daxili resursları hesabına görüləcək və orada vətəndaşlar üçün ən yaxşı şərait yaradılacaq”, - deyə S.Əsədov vurğulayıb.
Qaşqay