Ana səhifə
»
Xəbər lenti
»
Perm Azərbaycan Gənclər Komitəsi və Qırğızıstanda yaşayan azərbaycanlı gənclər Xocalı soyqırımı ilə bağlı videoçarx hazırlayıblar
Perm Azərbaycan Gənclər Komitəsi və Qırğızıstanda yaşayan azərbaycanlı gənclər Xocalı soyqırımı ilə bağlı videoçarx hazırlayıblar
Tarixin ən dəhşətli qətliamlarından olan Xocalı soyqırımının 29-cu ildönümü münasibətilə Perm Azərbaycan Gənclər Komitəsi və Qırğızıstanda yaşayan azərbaycanlı gənclər xüsusi videoçarx hazırlayıblar.
Videoçarxda qeyd edilir ki, 366-cı sovet alayının köməyi ilə erməni silahlı qüvvələrinin hücumu zamanı Xocalı şəhərində törədilən qətliamda qadın və uşaqlar da daxil olmaqla, 613 dinc sakin həlak olub, 1275 nəfər girov götürülüb, işğalçıların qətlə yetirə bilmədikləri soydaşlarımızın bir çoxu isə Ağdama gedərkən yolda şaxtadan donaraq ölüb.
Eyni zamanda, videoçarxda Xocalı qətliamının şahidi olan soydaşlarımızın dilindən 26 fevral 1992-ci ildə baş verən faciə barədə mətnlər səsləndirilib, törədilən cinayətin miqyası həmin dəhşətli hadisələri əks etdirən şəkillərlə təqdim olunub. Altyazı ilə hazırlanan videoçarxın sonunda xüsusi olaraq vurğulanır: “Unutmadıq, unutmuruq, unutmarıq”.
Qeyd edək ki, videoçarxda dünya şöhrətli fotoqraf Reza Deqatinin çəkdiyi fotoşəkillərdən də istifadə edilib.
- Oxunub: 2790 |
- Tarix: 26-02-2021 |
-
Çap et
|
