“Müzəffər Ali Baş Komandan İlham Əliyevin rəhbərlik etdiyi Azərbaycan Ordusu tərəfindən aparılan Vətən müharibəsində iştirakıma və möhtəşəm qələbəmizə görə fəxr duyuram. 44 günlük müharibədə bütün Azərbaycan xalqı ayağa qalxaraq ordumuza dəstək göstərdi. Xalqımızın Azərbaycan əsgərinə verdiyi dəstək bizdə böyük ruh yüksəkliyi yaratdı”. Bu fikirləri qəzetimizə açıqlamasında Vətən müharibəsi qazisi Mirzə Məmmədov deyib.
Qeyd edək ki, 1995-ci ildə Göygöl rayonunun Topalhəsənli kəndində anadan olan Mirzə Tarix oğlu Məmmədov müharibə başlayandan Şuşa şəhərinin azad olunmasına qədər rəşadətli döyüş yolu keçib. Gənc qazimiz əvvəlcə N saylı hərbi hissənin həmlə taborunun baş atıcısı kimi hərbi əməliyyatlara qoşulub: “Kəlbəcər rayonunun azad olunması uğrunda gedən döyüşlər zamanı qəlpə yarası alsam da, səhra hospitalında 1 gün qaldıqdan sonra yenidən döyüşlərə qatıldım. Sonra xidmətimi könüllü olaraq xüsusi təyinatlılara dəstək qüvvələrində davam etdirdim. Hadrutdan Şuşaya qədər gərgin döyüşlərdə iştirak etdim. Şuşanın alınması əməliyyatları zamanı bu dəfə başımdan snayper yarası alsam da, daha 3 gün vuruşdum. Bundan sonra məni məcburən hospitala apardılar...”.
Göstərdiyi şücaətə görə Azərbaycan Prezidenti İlham Əliyev tərəfindən “Kəlbəcərin azad olunmasına görə” və “Şuşanın azad olunmasına görə”, habelə “Hərbi xidmətlərə görə” medalları ilə təltif olunan Mirzə bildirib ki, torpaqlarımızın azad edilməsində iştirak etdiyinə görə böyük qürur hissi keçirir: “Qeyd edim ki, döyüşlər zamanı yüksək döyüş əzmi bizi qələbəyə doğru apardı. Generaldan tutmuş sıravi əsgərə qədər hər bir Azərbaycan oğlunun fədakarlığı bu tarixi zəfəri bizə nəsib etdi”.
M.Məmmədovun sözlərinə görə, döyüşə gedən gənclərimizdə Vətənə məhəbbət hissi həddindən artıq yüksək olub: “Eyni zamanda, düşmənə nifrət və qalib gəlmək arzusu bizi döyüş meydanında fədakarlığa sövq etdi. Çünki lap uşaq vaxtlarından ailədə validyenlərimiz, məktəbdə müəllimlərimiz daim bizə vətənpərvərlik hissi aşılayıblar. Biz heç vaxt Xocalıda törədilən soyqırımı, işğal olunmuş digər torpaqlarımızda törədilən cinayətləri unutmamışıq”.
Qaşqay RAMAZANOV