Sosial şəbəkələrdə Vətən müharibəsində iki oğlunun itkin düşdüyü iddia edilən Rəna Kazımova ilə bağlı tirajlanan xəbərlər təsdiqini tapmadı

Son vaxtlar sosial şəbəkələrdə milli maraqlarımıza zidd olan feyk xəbərlərin yayılması geniş vüsət alıb. Açıq-aşkar görünür ki, pərdə arxasından gizli şəkildə idarə olunan və istiqamətləndirilən şantaj maşını fəaliyyətdədir. 44 günlük Vətən müharibəsində müzəffər Ordumuzun düşmən üzərində qazandığı şanlı qələbəmizə hansısa bir formada kölgə salınmasına cəhdlər göstərilir.

Adını jurnalist qoyan, amma dəqiqləşdirilməmiş məlumatı tirajlayanların əməlləri təəssüf və ikrah hissi ilə qarşılanır

Əslində, belə feyk xəbərlərin üstündən keçmək də olar. Ancaq bu günlərdə bəzi internet media resurslarında, sosial şəbəkələrdə Vətən müharibəsində iki oğlunun itkin düşdüyü iddia edilən ana ilə bağlı tirajlanan xəbərlər artıq bütün sədlərin aşıldığı anlamına gəlir və buna əsla biganə qalmaq mümkün deyil.

Təbii ki, sosial şəbəkələrdə belə bir həssas mövzu ilə manipulyasiya edənlərin, həmçinin adını jurnalist qoyan, amma dəqiqləşdirilməmiş məlumatı tirajlayaraq “qəhrəmanlıq” nümayiş etdirənlərin də əməlləri təəssüf və ikrah hissi ilə qarşılanır.

Xatırladaq ki, sözügedən xəbərlərdə Rəna Kazımova adlı qadının oğlanları Valid və Azər Kazımovların guya müharibədə itkin düşdükləri deyilir və iddia olunur ki, ana indiyədək övladlarından heç bir xəbər tuta bilməyib.  Doğrusu, bu xəbər cəmiyyətdə müəyyən şübhələr də oyadıb. O mənada ki, ölkəmizdə şəhid ailələri və qazilərimizə dövlət və cəmiyyət səviyyəsində hər cür diqqət göstərilir. Bu baxımdan, “Rəna Kazımovanın müharibədə itkin düşən iki oğlu barədə bu vaxta qədər hər hansı məlumat ala bilməməsi” xəbərinin nə qədər gerçək olması müəyyən suallar yaradıb.

Bu cür yalan xəbərlər yaymaq şəhidlərin ruhuna, onların valideynlərinə və qazilərimizə ciddi hörmətsizlikdir

Beləliklə, qayıdaq Rəna Kazımovanın “müharibəyə göndərdiyi iki övladından itkin düşdüyü” iddia olunan xəbərə. Məsələ burasındadır ki, xəbər araşdırıldıqda bəlli olub ki, Rəna Kazımovanın dilindən səsləndirlən məlumatlar feykdir. Rəna Kazımova əslən Lənkəranın Osaküçə kəndindəndir. 1 il yarımdır ki, Suraxanı rayonunun Hövsan qəsəbəsində kirayədə yaşayır. Lənkəran rayonunun Osaküçə kəndinin bələdiyyə sədri Rəna Kazımovanın yaxın qohumlarının məlumatına istinad edərək  KİV-ə bildirib ki, həmin qadının hərbi xidmətə gedəcək yaşda övladı olmayıb. Ümumiyyətlə, Rəna Kazımovanın övladının olması ilə bağlı heç kəsdə məlumat yoxdur, yaxın qohumları bunu istisna edirlər. O da bildirilir ki, Rəna Kazımovanın səhhətində psixi problemləri var və müalicə alır.

Daha iki fakta diqqət yetirək. Əvvala, Səfərbərlik və Hərbi Xidmətə Çağırış üzrə Dövlət Xidmətinin Suraxanı rayon şöbəsindən bəhs olunan adda şəxslərin hərbi xidmətə çağrılmadığı təsdiqlənib. Müdafiə Nazirliyinin açıqladığı itkin siyahısında da Valid və Azər Kazımov qardaşlarının adı yoxdur.

Beləliklə, saxtakarlıq və aşkar yalan ortadadır. Şübhəsiz ki, bu cür yalan xəbərlərin sosial şəbəkələrə çıxarılması, internet resursları vasitəsilə yayılması müharibədə canlarını Vətən uğrunda fəda edən şəhidlərin ruhuna, onların valideynlərinə, eləcə də qazilərimizə ciddi hörmətsizlikdir. Ümumiyyətlə, müharibədən sonra feyk xəbərlərin sosial şəbəkələrə yol açması düşmən dəyirmanına su tökmək məqsədi daşıyır

MÜBARİZ