Azərbaycan COVID-19-a qarşı vaksinasiyaya başlayan ilk ölkələr sırasındadır. Dünyada əksər ölkələr hələ vaksinasiyaya başlamayıb. Yeri gəlmişkən qeyd edək ki, Nazirlər Kabinetinin 2021-ci il 16 yanvar tarixli Sərəncamı ilə “Azərbaycan Respublikasında COVID-19 xəstəliyi əleyhinə 2021-2022-ci illər üçün “Vaksinasiya Strategiyası” qəbul olunub.
Yanvarın 18-dən başlanılan vaksinasiya prosesi təqribən iki həftə davam edəcək və ilk olaraq tibb işçiləri vaksinasiyaya cəlb olunacaq. Növbəti mərhələdə - fevralın 1-dən yaşı 65-dən yuxarı olan vətəndaşların vaksinasiya edilməsinə başlanılacaq.
Məsələ ilə bağlı qəzetimizə açıqlama verən Səhiyyə Nazirliyinin nəzdində fəaliyyət göstərən COVID-19-la mübarizə işçi qrupunun üzvü Aris Rüstəmov bildirib ki, koronavirusa qarşı vaksinlər təlim kursu keçmiş tibb işçiləri tərəfindən vurulacaq. Peyvənd ediləcək poliklinikalarda tibb işçiləri seçilərək xüsusi kurslara cəlb olunub. Onun sözlərinə görə, burada əsas məqsəd əhaliyə tələb olunan sayda tibb personalının olmasıdır: “Vaksinasiya ilə bağlı poliklinikaya müraciət edən vətəndaşlar üçün bütün şərait və rahatlıq düşünülüb. Poliklinikaya daxil olduğumuz zaman xüsusi işarələr bizi birbaşa peyvənd olunacaq sahəyə yönləndirir. Peyvəndlər xüsusi ayrılmış peyvənd otaqlarında həkim nəzarəti altında ediləcək. Bu otaqlar qeydiyyat otağı, vaksinasiya otağı və müşahidə otağına ayrılıb”.
Mütəxəssis vurğulayıb ki, peyvənd həkim yoxlanışı və göstərişindən sonra vurulacaq: “İlk növbədə, müraciət edən vətəndaş qeydiyyat otağında qeydiyyata alınır. Daha sonra vaksinasiya otağına ötürülür. Peyvənd olunduqdan sonra 30 dəqiqə ərzində vətəndaş müşahidə otağında yarana biləcək hər hansı bir əks-təsirlə əlaqəli olaraq izlənməyə alınır. Bu müddət ərzində heç bir əlamət üzə çıxmazsa, vətəndaş evə buraxılır.
Peyvənd həkim yoxlanışı və göstərişindən sonra vurulacaq. Bu səbəbdən vaksinasiyadan öncə müvafiq olaraq sahə həkiminin yoxlanışından keçmək mütləqdir”.
Qeyd edək ki, daha bir mühüm məsələ də peyvəndlərin düzgün saxlanılmasıdır. A.Rüstəmov bildirib ki, bunun üçün vaksinasiya həyata keçiriləcək bütün tibb məntəqələri soyuducular və termoçantalarla təmin edilib.
MÜŞFİQƏ