Dünyanın bir çox ölkəsində koronavirus əleyhinə vaksinasiya kampaniyasına start verilməsinə baxmayaraq, bu il hər hansısa bir ölkədə virusa qarşı kollektiv immunitetin formalaşması və bu yolla əhalinin əsas etibarilə yoluxmaya qarşı qorunması mümkün olmayacaq. Bu barədə Ümumdünya Səhiyyə Təşkilatının (ÜST) elmi tədqiqatlar üzrə əsas səlahiyyətli nümayəndəsi Soumya Svaminatan mətbuata açıqlamasında bildirib.
Məlumat üçün bildirək ki, vaksinlər öldürülmüş və zəiflədilmiş mikroorqanizmlər, yaxud onların ifraz etdiyi bəzi antigen maddələrdir. Vaksinasiyanın aparılmasının məqsədi əhali arasında kollektiv immunitetin yaranmasına nail olmaqdır. Əhalinin çox hissəsində istər təbii, istərsə də vaksinasiya vasitəsilə immunitet yaranarsa, epidemik proses tez bir vaxtda başa çata bilər.
Məsələ ilə bağlı qəzetimizə açıqlama verən Səhiyyə Nazirliyinin baş infeksionisti Təyyar Eyvazov bildirib ki, artıq dünyanın bir sıra ölkəsində yeni növ koronavirus (COVID-19) infeksiyasına qarşı vaksinasiya tədbirlərinə başlanılıb. Həmin tədbirin yaxın zamanda Azərbaycanda da tətbiq olunacağı gözlənilir: “Əksər ölkələrdə vaksinasiyanın birinci mərhələsinə risk qrupuna daxil olanlar cəlb olunub.
Ölkəmizdə də ilk mərhələdə risk qrupunda olanlara peyvənd vurulacaq. Risk qruplarını hər bir ölkə özü müəyyən edir. Bunlar, ilk növbədə, əsasən, tibb işçiləri, yaşı 65-dən yuxarı olanlar və bir də uzun müddət xroniki xəstəliklərdən əziyyət çəkənlərdir. Vaksinasiyanın epidemik prosesin qırılmasına təsiri onun kütləvi aparılması zamanı mümkündür. Ümumdünya Səhiyyə Təşkilatının (ÜST) əvvəlki təcrübəsi göstərir ki, vaksinasiyanın məcburi edilməsi neqativ reaksiyalara səbəb olub. Ona görə də onun könüllülük prinsipi əsasında aparılması daha düzgün yoldur”.
Baş infeksionistin dediyinə görə, xroniki xəstəlikləri olanların vaksinasiyadan imtina etməsi onların hər zaman yoluxma riski ilə üz-üzə qalması deməkdir: “Bunlara xroniki ürək-damar, tənəffüs sistemi, endokrin sistemi xəstəliklərindən əziyyət çəkənlər və immun çatışmazlığı olanlar aiddir. Onlar yoluxduqları halda xəstəliyin ağırlaşmasının risk qrupundadırlar, bu zaman fəsadlaşma və ölüm halları da baş verə bilər”.
MÜŞFİQƏ