“Artıq işğaldan azad edilən rayonlarımızın, şəhər və kəndlərimizin yenidən qurulması prosesinə başlanılır. 2020-ci ildə əldə edilən qələbə ölkəmizin ərazi bütövlüyünün təmin olunmasına şərait yaratdı. Yeni mərhələdə isə bu regionlar yenidən dirçəldiləcək, həmin ərazilərdə kənd təsərrüfatının, sənayenin inkişafına zəmin yaradılacaq. 2020-ci ilin yekunlarına həsr olunmuş videoformatda keçirilən müşavirədə çıxış edən Prezident İlham Əliyev də bildirdi ki, indi torpaqlar azad edilib, indi böyük qayıdış başlanmalıdır, böyük inkişaf prosesləri başlanmalıdır. Dövlət başçısı vurğuladı ki, biz bütün bu işləri daha da fəal, daha da məqsədyönlü şəkildə aparmalıyıq ki, Azərbaycanın imkanlarını genişləndirək və ölkəmizin inkişaf dinamikasını artıraq”. Bu fikirləri qəzetimizə açıqlamasında Azərbaycan Milli İstiqlal Partiyasının sədri Arzuxan Əlizadə deyib.
Onun sözlərinə görə, həmin ərazilərdə mühüm infrastrukturlar yaradılmalıdır ki, yurd-yuvalarına qayıdacaq əhalinin hər hansı bir problemi olmasın: “İnanırıq ki, qısa zaman kəsiyində işğaldan azad edilmiş rayonlarda həyat yenidən canlanacaq və öz doğma yurd-yuvalarına qayıdan vətəndaşlarımız rahat yaşayış şərtləri ilə təmin ediləcək. Qısa zamanda bir sıra bölgələrimizdə vacib infrastrukturlar yaradılıb, elektrik enerjisi ilə təminat, su təminatı bərpa olunub. Azərbaycan qüdrətli dövlətdir və ölkəmizin maliyyə sabitliyi imkan verir ki, həmin regionlar digər rayonlarımız kimi yenidən qurulsun və özünün inkişaf mərhələsinə qədəm qoysun”, - deyə A.Əlizadə əlavə edib.
Partiya sədri vurğulayıb ki, mütəxəssislərimiz işğaldan azad edilən ərazilərimizin iqtisadi potensialını da yüksək qiymətləndirirlər. Yəni bu regionlarda həyatın bərpası, qaçqın və məcburi köçkünlərimizin evlərinə qayıdışı ölkəmizdə kənd təsərrüfatının və digər sahələrin inkişafına müsbət yöndə əhəmiyyətli təsir göstərəcək. Bu ölkəmizin aqrar sektorunun inkişafı ilə yanaşı, işsizliyin aradan qaldırılmasına da xidmət göstərir.
PƏRVİZ