“Ötən il ölkəmizin tarixinə həm də milli birlik, həmrəylik ili kimi yazıldı. İlin əvvəlində ölkəmizdə yaranan yeni siyasi konfiqurasiya partiyalararası münasibətlərin daha yüksək inkişafına təkan verdi. 2020-ci ilin yekunlarına həsr olunmuş videoformatda keçirilən müşavirədə çıxış edən ölkə başçısı bildirdi ki, 2020-ci ilin fevral ayında ölkəmizdə keçirilmiş parlament seçkiləri demokratiya istiqamətində atılmış növbəti ciddi addım idi. Parlamentin rəhbər orqanları yeniləndi, rəhbərliyə yeni insanlar gəldi. İlk dəfə olaraq parlamentin Sədr müavini müxalifət partiyasının nümayəndəsi seçildi. Cənab Prezident qeyd etdi ki, ilk dəfə olaraq parlament komitələrinin sədr və müavin vəzifələrinə müxalifət nümayəndələri seçildilər. Bu, yeni siyasi mədəniyyətin təzahürüdür. Bu, bütün siyasi qüvvələr arasındakı əməkdaşlığa yönəlmiş ciddi bir addımdır”. Bu fikirləri qəzetimizə açıqlamasında Azərbaycan Sosial Rifah Partiyasının sədri Əsli Kazımova deyib.
Onun sözlərinə görə, bu əməkdaşlıq, dialoq sonrakı dövrdə daha da inkişaf etdirildi. Partiya sədri vurğulayıb ki, ötən il bir sıra siyasi partiyaların qeydiyyat probleminin həlli, o cümlədən onların qərargahlarla təmin olunması onu deməyə əsas verir ki, 2020-ci il ölkəmizdə siyasi münasibətlərin inkişafında yeni mərhələnin başlanğıcı oldu: “Vətən müharibəsi dövründə 50 siyasi partiyanın ölkə Prezidentinin apardığı siyasətə dəstək verməsi olduqca qürurverici oldu. İdeologiyasından və fərqli düşüncələrindən asılı olmayaraq, cənab Prezidentin ətrafında sıx birləşən siyasi təşkilatların bu addımı milli birliyimizin, həmrəyliyimizin nümayişinə çevrildi. Vətən müharibəsi zamanı siyasi qüvvələrin bir amal uğrunda birləşməsi müsbət tendensiyalara yol açdı və bu amil qələbə qazanılmasında mühüm rol oynadı. Bununla, eyni zamanda, dialoq mühitinin daha da inkişaf etdirilməsinə mühüm töhfə verildi”, - deyə Əsli Kazımova əlavə edib.
PƏRVİZ