Naftalan Şəhər İcra Hakimiyyəti və Yeni Azərbaycan Partiyası (YAP) Naftalan şəhər təşkilatının birgə təşəbbüsü ilə “Prezident İlham Əliyevin siyasi fəaliyyətinin uğurları” mövzusunda videokonfrans formatında tədbir keçirilib. Tədbirdə Naftalan Şəhər İcra Hakimiyyətinin başçısı Vüqar Novruzov, partiyanın Naftalan şəhər təşkilatının ərazi ilk partiya təşkilatlarının sədrləri, ziyalılar, gənclər iştirak ediblər.
Tədbiri giriş sözü ilə Vüqar Novruzov açaraq bildirib ki, cənab Prezident İlham Əliyevin ölkəyə rəhbərlik etdiyi 2003-cü ildən bu vaxtadək olan müddət Azərbaycan tarixinə hərtərəfli və sürətli inkişaf dövrü kimi daxil olub.
V.Novruzov qeyd edib ki, 30 illik Qarabağ həsrəti Böyük Qələbə, işğal altındakı torpaqlarımızın azad edilməsi ilə başa çatdı. Azərbaycan Respublikasının Prezidenti, Müzəffər Ali Baş Komandan İlham Əliyevin rəhbərliyi ilə rəşadətli Ordumuz döyüş meydanında düşmənin dərsini verdi. Azərbaycan xalqı hər zaman olduğu kimi, Müzəffər Ali Baş Komandan, Prezident İlham Əliyevin ətrafında bir yumruq kimi birləşdi. Xalq-iqtidar birliyi bu tarixi qələbənin əsas özüllərindən biri rolunu oynadı və siyasət meydanında Prezidentimizin, ön cəbhədə rəşadətli Ordumuzun, arxa cəbhədə ləyaqətli xalqımızın inamı, mətin duruşu işğalçı Ermənistanı məğlubiyyətini boynuna almağa, kapitulyasiyaya məcbur etdi. Qarabağ müharibəsinin qalibi cənab İlham Əliyev bu möhtəşəm zəfəri ilə yenilməz sərkərdə və çox mahir diplomat kimi adını tarixə yazdırdı.
Sonra YAP Naftalan şəhər təşkilatının sədri Hatəm Qocayev çıxış edərək vurğulayıb ki, cənab Prezident İlham Əliyevin rəhbərliyi ilə Azərbaycanın istər daxili, istərsə də xarici siyasətində əldə edilən hər bir uğur Ulu Öndər Heydər Əliyevin zəkasının təcəssümü, Onun irsən qoyub getdiyi milli tərəqqi ideyalarının təzahürüdür.
Tədbirdə digər çıxış edənlər də ötən 17 ildə əldə edilən uğurlardan bəhs ediblər.