“ATƏT-in Minsk qrupu uzun illər ərzində Dağlıq Qarabağ münaqişəsinin ədalətli həlli yolunda heç bir səmərəli təşəbbüs göstərmədi və əslində, problemin həll olunmaması üçün əlindən gələni əsirgəmədi”. Bu fikri qəzetimizə açıqlamasında Milli Məclisin Aqrar siyasət komitəsinin sədri Tahir Rzayev deyib.
Tahir Rzayev bildirib ki, qurumun fəaliyyətsizliyi nəticəsində BMT Təhlükəsizlik Şurasının erməni silahlı birləşmələrinin işğal olunmuş əraziləri qeyd-şərtsiz tərk etmələri barədə qətnamələri, bir çox beynəlxalq təşkilatların qərar və göstərişləri kağız üzərində qaldı, həmin qərarlara əməl olunmadı və nəticədə Ermənistan daha da azğınlaşdı, yeni təcavüzkarlıq planlarına əl atdı. Onun sözlərinə görə, Azərbaycan Respublikasının Prezidenti cənab İlham Əliyev ATƏT-in Minsk qrupunun Fransadan və ABŞ-dan olan həmsədrlərini, Rusiyanın Azərbaycandakı fövqəladə və səlahiyyətli səfirini, ATƏT-in fəaliyyətdə olan şəxsi nümayəndəsini bu günlərdə qəbul edərkən bunları bir daha xatırladıb və Minsk qrupunun fəaliyyətsizliyini onların nəzərinə çatdırıb.
“Dövlətimizin başçısının qeyd etdiyi kimi, 28 il vasitəçilik mandatından səmərəsiz istifadə edilib, haqqın-ədalətin bərqərar olması üçün heç bir əsaslı tədbir görülməyib. Belə olduğu halda, Azərbaycan özü tarixi ədaləti bərpa edib, BMT Təhlükəsizlik Şurasının qətnamələrinin tələblərini yerinə yetirərək erməni təcavüzkarlarını işğal etdikləri ərazilərdən çıxarıb. Əlbəttə, bu Azərbaycanın haqqıdır və xalqımız öz haqqını alıb. ATƏT-in Minsk qrupunun həmsədrləri Fransa və ABŞ bunu qiymətləndirməlidir. Amma bəzi beynəlxalq dairələr yenidən ermənipərəst mövqeyindən çıxış edərək əldə olunmuş qələbəmizə kölgə salmaq istəyirlər ki, bu da qəbuledilməzdir və beynəlxalq hüquq normalarına ziddir. Digər tərəfdən, Rusiya Federasiyasının Prezidenti Vladimir Putinin dediyi kimi “artıq Dağlıq Qarabağ münaqişəsi yoxdur”. Belə olan halda Minsk qrupu kimə və nəyə lazımdır? Bu barədə ATƏT fikirləşməli və qəti qərara gəlməlidir. Əgər bu qrup sülhməramlı tədbirlərə qoşulub neytral mövqe tutaraq xalqlar arasında qarşılıqlı münasibətlərin yaradılmasına xidmət edərsə o vaxt onun fəaliyyətini dəstəkləmək olar”, - deyə komitə sədri vurğulayıb.