Əlahiddə Ümumqoşun Orduda növbəti zabit hazırlığı kursunu bitirən məzunların buraxılış mərasimi keçirilib

AZ RU EN

Ana səhifə / Xəbər lenti / Əlahiddə Ümumqoşun Orduda növbəti zabit hazırlığı kursunu bitirən məzunların buraxılış mərasimi keçirilib

Əlahiddə Ümumqoşun Orduda növbəti zabit hazırlığı kursunu bitirən məzunların buraxılış mərasimi keçirilib

10.01.2019 [11:28]

Muxtar respublikada Əlahiddə Ümumqoşun Orduda növbəti zabit hazırlığı kursunu bitirən məzunların buraxılış mərasimi olub.

Əlahiddə Ümumqoşun Ordunun mətbuat xidmətindən AZƏRTAC-ın Naxçıvan bürosuna bildiriblər ki, əvvəlcə buraxılış mərasiminə hazırlıqla bağlı məruzə edilib. Döyüş bayrağı sıra meydanına gətirildikdən sonra Azərbaycan Respublikasının Dövlət himni səsləndirilib.

Tədbirdə Əlahiddə Ümumqoşun Ordu komandanı, general-leytenant Kərəm Mustafayev çıxış edərək ümummilli lider Heydər Əliyevin əsasını qoyduğu ordu quruculuğu siyasətinin bu gün Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyev tərəfindən uğurla davam etdirildiyini və bu məqsədyönlü işin muxtar respublikada da qətiyyətlə aparıldığını bildirib. Diqqətə çatdırılıb ki, Naxçıvan Muxtar Respublikası Ali Məclisi Sədrinin qayğısı ilə ordu, birləşmə və hissələr böyük təşkilatlanma yolu keçərək hər gün daha da güclənir. Aparılmış məqsədyönlü tədbirlərin nəticəsidir ki, 2018-ci tədris ilini uğurla başa vuran Naxçıvan Qarnizonu qoşunlarında ixtisas hazırlığı kurslarında iştirak edərək peşəkar hərbçi kimi yetişmək istəyən gənclərin sayı daha da artmaqdadır. Tarixə qızıl hərflərlə yazılan “Günnüt əməliyyatı”nın uğurla nəticələnməsi kurslarda peşəkar döyüşçü kimi yetişən hərbçilərimizin sayəsində mümkün olub. İnanırıq ki, hər bir məzun kursda qazandığı biliklər nəticəsində peşəkar, vətənpərvər əsgərlərin yetişdirilməsi üçün əlindən gələni əsirgəməyəcək.

Tədbirdə çıxış edən Naxçıvan Muxtar Respublikasının təhsil naziri Rəhman Məmmədov deyib ki, Əlahiddə Ümumqoşun Orduda səkkizinci zabit hazırlığı kursunu bitirən məzunlardan 21 nəfəri ümumtəhsil məktəblərində gənclərin çağırışaqədərki hazırlığı fənnini tədris edəcək. Bu gün məzun olan hərbi rəhbərlər şagirdlərdə hərb sənətinə maraq yaratmalı, gəncləri hərbi xidmətə yüksək səviyyədə hazırlamalıdırlar. Belə ki, hərbi rəhbərlərin gənclərin çağırışaqədərki hazırlığı fənnini peşəkar səviyyədə tədris etmələri üçün Naxçıvan Muxtar Respublikasında hərtərəfli şərait yaradılıb. Həmin fənni tədris edən hərbi rəhbərlərin peşəkarlıqlarının artırılması məqsədilə Əlahiddə Ümumqoşun Orduda ildə iki dəfə təlim toplantıları keçirilir.

Məzun Hüseyn Bağırov peşəkarlıqlarının artırılmasına xidmət edən zabit hazırlığı kursunun muxtar respublikada təşkil edilməsinin hərb işinə verilən yüksək dəyər olduğunu vurğulayaraq, dövlətimizə minnətdarlığını bildirib.

Əlahiddə Ümumqoşun Ordu komandanının birinci müavini - qərargah rəisi, general-mayor Fazil Ağalarov məzunların ilkin leytenant hərbi rütbəsi verilməklə ixtisaslarına uyğun vəzifələrə təyin olunmaları haqqında müdafiə nazirinin əmrini çatdırıb.

Əmr oxunduqdan sonra kursu daha yüksək qiymətlərlə başa vuran məzunlara sertifikat və qiymətli hədiyyələr, digər məzunlara isə sertifikatlar təqdim edilib.

Kurs birincisi Abbas Səfərov xatirə lövhəsinə buraxılış emblemini vurub. Məzunlar döyüş bayrağı qarşısında and içdikdən sonra tribuna önündən təntənəli keçid olub.

Sonda məzunlarla xatirə şəkli çəkdirilib.

Paylaş:

Baxılıb: 180 dəfə