“Azərbaycan-İtaliya əlaqələri yüksələn xətlə inkişaf edir. İtaliya və Azərbaycan strateji tərəfdaşdırlar və iki ölkəni bir-birinə sıx əlaqələr bağlayır”. Bu fikirləri qəzetimizə açıqlamasında Vətəndaş Birliyi Partiyasının sədri, Milli Məclisin deputatı Sabir Hacıyev deyib.
S.Hacıyev bildirib ki, 2020-ci ilin İtaliyada “Azərbaycan ili” elan olunması, Vətən müharibəsi dövründə İtaliyanın Azərbaycanla həmrəyliyini göstərən faktlar və İtaliya mediasının məsələyə obyektiv yanaşması iki ölkə arasındakı münasibətlərin yüksək səviyyədə olmasından xəbər verir: “Bir müddət öncə Azərbaycan Prezidenti İlham Əliyevin İtaliyanın “Maire Tecnimont Group” şirkətinin sədrinin başçılıq etdiyi nümayəndə heyətini videoformatda qəbul etməsi, işğaldan azad edilmiş ərazilərin bərpasına dost ölkə kimi İtaliya şirkətlərinin də cəlb edilməsi və onlara geniş imkanlar yaradılması bunu bir daha sübut edir. Onu da qeyd edim ki, Prezident İlham Əliyevin 2020-ci ilin fevralında İtaliyaya səfəri zamanı da ölkələrimiz arasında əlaqələrdə mühüm uğurlar əldə edilib. Bu baxımdan, Cənub Qaz Dəhlizinin reallaşdırılması ilə əlaqədar Azərbaycan-İtaliya əməkdaşlığı nümunəvi xarakter daşıyır. Eyni zamanda, Azərbaycanın İtaliya ilə “yaşıl kimya”, “yaşıl enerji”, “yaşıl enerji zonası”, “ağıllı şəhər”, “ağıllı kənd” konsepsiyaları əsasında sıx əməkdaşlıqda maraqlı olması iki ölkə arasında əlaqələrin daha da genişlənməsini şərtləndirir”.
Partiya sədri onu da qeyd edib ki, Bakıda İtaliya-Azərbaycan Universitetinin təsis edilməsi də əhəmiyyətli hadisədir və bu addım ölkələrimiz arasında dostluq əlaqələrinin güclənməsinə öz töhfəsini verəcək: “İtaliya-Azərbaycan Universitetinin yaradılması yeni ixtisaslar üzrə gənc azərbaycanlı kadrların hazırlanması və təlim keçməsi baxımından perspektivdə böyük önəm kəsb edəcək”.
Qaşqay ZİYƏDDİNOĞLU