Xəzər türklərinin tarixindən bəhs edən tiralogiya

Bakı:

13°C

94%

0m/s

Əlaqə

AZ RU EN

Ana səhifə / Arxiv / Xəzər türklərinin tarixindən bəhs edən tiralogiya

Xəzər türklərinin tarixindən bəhs edən tiralogiya

22.11.2019 [09:59]

Bir neçə tarixi romanın müəllifi Nadir Doğanla görüş keçirilib

Bakı Yunus Əmrə İnstitutunda TRT-nin keçmiş əməkdaşı, bir neçə tarixi romanın müəllifi Nadir Doğanla görüş keçirilib. Bakı Yunus Əmrə İnstitutunun təşkilatçılığı ilə keçirilən görüşdə Türkiyənin Azərbaycandakı səfiri Erkan Özoral, Şimali Kipr Türk Respublikasının Bakıdakı təmsilçisi Ufuk Arca Turgener, millət vəkili, “Yeni Azərbaycan” qəzetinin baş redaktoru Hikmət Babaoğlu, TRT-nin Bakı təmsilçisi Murat Akkoç, ölkəmizdəki türkiyəli iş adamları, ziyalılar, QHT və KİV nümayəndələri, həmçinin tələbələr iştirak ediblər.
Tədbirdə öncə Nadir Doğanın özü, həmçinin Xəzər türklərinin tarixi ilə bağlı yazdığı “Togarmanın cocukları”, “Kuzeyə yolçuluq” və “Altın bozqurtlar” adlı tarixi romanları barədə ətraflı məlumat verilib.
Sonra çıxış edən Türkiyənin Azərbaycandakı səfiri Erkan Özoral bu kitablarda bəhs edilən tarixi hadisələrin dünya coğrafiyasının strateji baxımdan ən önəmli nöqtələrini əhatə etdiyini bildirib. Səfir “Bu kitablarla biz qapı açmış olacağıq. Çünki bu kitablarda Hindistandan Misirə, oradan Qərbə və Avropanın şimalına qədər uzanan qədim dünya dediyimiz qitələrin, demək olar, hamısını əhatə edən böyük bir tarixdən bəhs edilir”, - deyə əlavə edib.
Millət vəkili, “Yeni Azərbaycan” qəzetinin baş redaktoru Hikmət Babaoğlu isə Xəzərin türklərin qapalı bir dənizi olduğunu deyib. Onun sözlərinə görə, hər zaman Xəzərin dörd bir yanında türklər yaşayıblar və bu gün də bu dənizin sahillərində yaşayan türk xalqlarıdır.
Millət vəkili çıxışında sözügedən kitablarla bağlı bir məqama da toxunub. Daha doğrusu, Nadir Doğanın üç tarixi romanından biri olan “Togarmanın cocukları” romanına toxunan Hikmət Babaoğlu deyib ki, vaxtilə Abbasqulu Ağa Bakıxanov Togarma ilə bağlı yazısında Mahmut Kaşğariyə istinad edib: “Mahmut Kaşğari XI əsrdə “Divanü lüğat-it Türk” əsərində “yalavac Nuhun oğlu Yafəsin oğlu Qomerin oğludur Togarma”, - deyə bəhs edir. Mahmut Kaşğarinin bəhs etdiyi qomerlər kimmerlərdir. Yəni Azərbaycan tarixşünaslığı onları kimmerlər adlandırır. Biz kimmerlərə qəmərlər deyirik və Azərbaycanda çoxlu sayda Qəmərli adlı kəndlər var. Bu, bir daha göstərir ki, biz Togarmanın varisləriyik”.
Millət vəkili həmçinin müasir dövrümüzdə tarixi romanların, özü də türklərin tarixindən bəhs edən romanların yazılmasının təqdirəlayiq olduğunu deyib.
Sonda çıxış edən Nadir Doğan bu cür tədbirin təşkilinə və romanlarına göstərilən marağa görə minnətdarlığını bildirib. Azərbaycanın qədim bir türk yurdu kimi hər zaman onun diqqətini çəkdiyini söyləyən Nadir Doğan ölkəmizə səfər etməsinə yaradılan şəraitdən məmnun olduğunu deyib.
Konkret olaraq yuxarıda bəhs edilən kitablara gəlincə, müəllif “mən türklərin tarixinin bəzi dövrlərini, xüsusilə Xəzər türkləri ilə bağlı tarixi hadisələri roman dili ilə yazdım ki, hər kəs üçün oxunaqlı olsun. Hesab edirəm ki, bu həm böyüklərin, həm də uşaqların türklərin tarixini daha dərindən öyrənmələrinə kömək edə bilər” - deyib.
O, gələcəkdə də bu istiqamətdə fəaliyyətini davam etdirəcəyini söyləyib.
Onu da bildirmək yerinə düşər ki, Nadir Doğan dünən həmçinin Xəzər Universitetinin müəllim və tələbə heyəti ilə də görüşüb. Görüşdə “Xəzər dövlətinin çöküşü” mövzusunda çıxış edən türkiyəli müəllif sonda sualları cavablandırıb.

Paylaş:

Baxılıb: 684 dəfə