Heydər Əliyev
yeni azerbaycan logo

Ana səhifə / Arxiv / Azərbaycan xalqı Prezident İlham Əliyevin həyata keçirdiyi islahatları yüksək qiymətləndirir

Azərbaycan xalqı Prezident İlham Əliyevin həyata keçirdiyi islahatları yüksək qiymətləndirir

11.04.2019 [09:29]

Fransanın “OpinionWay” şirkətinin ölkəmizdə keçirdiyi rəy sorğusunun nəticələri bu reallığı bir daha təsdiq edir
Azərbaycan dünya miqyasında dayanıqlı inkişafa və möhkəm ictimai-siyasi sabitliyə malik olan güclü, nüfuzlu ölkə kimi tanınır. Təbii ki, bu inkişafın və sabitliyin əsasında uğurla reallaşdırılan praqmatik daxili və xarici siyasət kursu dayanır. Milli inkişaf modelinin uğurla tətbiq edilməsi və hədəflənən nəticələrin əldə olunması, sosial-iqtisadi və institusional islahatların uğurla həyata keçirilməsi, qanunvericilik bazasının mütəmadi olaraq zənginləşdirilməsi, möhkəm təməllərə söykənən ictimai-siyasi sabitliyin qorunması, ölkəmizin beynəlxalq münasibətlər sisteminin nüfuz və güc iyerarxiyasında sürətlə irəliləməsi və digər nailiyyətlər müasir müstəqil Azərbaycanın gerçəkliklərini təşkil edir. Təsadüfi deyil ki, ictimai rəyin öyrənilməsi üzrə müxtəlif sosioloji tədqiqat mərkəzlərinin Azərbaycan əhalisi arasında keçirdiyi sorğular da ölkəmizdə vətəndaşların Prezident İlham Əliyevin rəhbərliyi ilə həyata keçirilən siyasətə mütləq inam və etimad bəslədiklərini, xalq-iqtidar birliyinin sarsılmaz təməllərə söykəndiyini göstərir. Yeri gəlmişkən, Fransanın “OpinionWay” şirkətinin bu ilin mart ayında ölkəmizdə keçirdiyi rəy sorğusu da bu reallığı təsdiqləyir. Qeyd edək ki, Azərbaycan Respublikasındakı mövcud ictimai-siyasi vəziyyətə, Prezident İlham Əliyevin son bir ildə həyata keçirdiyi islahatlar kursuna, hökumətin ümumi daxili və xarici siyasətinə ölkə əhalisinin münasibətini öyrənmək məqsədilə “OpinionWay” şirkəti tərəfindən Naxçıvan MR istisna olmaqla Azərbaycanın bütün bölgələrində geniş rəy sorğusu keçirilib. Sorğunun nəticələrinə görə, respondentlərin 80,1%-i ölkədəki mövcud ictimai-siyasi və sosial-iqtisadi sabitliyin qorunub saxlanılmasını Prezident İlham Əliyevin fəaliyyətinin ən uğurlu nəticəsi kimi dəyərləndirib. Sorğunun “Prezident İlham Əliyevin son bir ildə gördüyü işləri necə qiymətləndirirsiniz?” sualına respondentlərin 85,1%-i bütövlükdə müsbət cavab verib.
“OpinionWay” şirkətinin “Azərbaycanda həyata keçirilən sosial-iqtisadi fəaliyyət və bu sahədə Prezident İlham Əliyevin son ildə apardığı islahatları necə qiymətləndirirsiniz” sualına sorğuda iştirak edənlərin 90,5%-i bütövlükdə müsbət cavab verib. Bu məqamda vurğulamaq yerinə düşər ki, Cənubi Qafqaz regionunun lider dövləti olan, spesifik inkişaf modeli ilə fərqlənən Azərbaycanda bütün sahələri əhatə edən çoxşaxəli və paralel islahatlar həyata keçirilir. Ölkəmizdə uğurla və inamla davam etdirilən islahatlar dinamik tərəqqini sürətləndirməklə yanaşı, yeni inkişaf perspektivləri formalaşdırıb. Eyni zamanda, çevik və məqsədyönlü fəaliyyət göstərən yeni idarəetmə strukturunun formalaşdırılması üçün mühüm institusional islahatlar həyata keçirilib, əhəmiyyətli nəticələr əldə olunub. Şübhəsiz ki, çoxşaxəli islahatların reallaşdırılması davamlı xarakter daşıyır. Dərin iqtisadi və institusional islahatların davamı kimi hüquqi islahatların aparılması da bu kontekstdə mühüm əhəmiyyətə malikdir. Təsadüfi deyil ki, Azərbaycanda həyata keçirilən çoxşaxəli islahatlar beynəlxalq səviyyədə, nüfuzlu reytinq agentlikləri tərəfindən də yüksək qiymətləndirilir. Dünya Bankının “Doing Business” hesabatında Azərbaycanın hazırda dünya miqyasında 25-ci yerdə qərar tutması heç də təsadüfi xarakter daşımır. Bir sözlə, aparıcı beynəlxalq reytinq agentlikləri Azərbaycanın sosial-iqtisadi və maliyyə durumunu, o cümlədən reallaşdırılan islahatları müsbət dəyərləndirirlər.
Digər tərəfdən, Prezident İlham Əliyevin seçkiqabağı vədlərinin yerinə yetirilməsinin qiymətləndirilməsinə dair “OpinionWay”in sualına respondentlərin bütövlükdə 75,6%-i müsbət cavab verib. Qeyd etmək lazımdır ki, ölkəmizdə 2018-ci il 11 aprel tarixində keçirilən seçkilər ərəfəsində cənab İlham Əliyev Özünün ənənəsinə sadiq qalaraq ilk növbədə əvvəlki dövrdə reallaşdırılan sosial siyasətin bundan sonra da prioritetliyini təmin etmək məqsədilə bir sıra vədlər vermişdi. Seçkilərdə xalqın böyük inamını qazanan cənab İlham Əliyev andiçmə mərasimində gələcək fəaliyyətində də Azərbaycan vətəndaşının maraqlarının, onun rifahının daim diqqət mərkəzində olacağını qətiyyətlə ifadə etmişdi. Məhz ötən müddət ərzində dövlətimizin başçısının rəhbərliyi ilə həyata keçirilən ardıcıl və məqsədyönlü tədbirlər nəticəsində əhalinin rifahı durmadan yüksəlib, eləcə də ölkədə 3 milyon insanı əhatə edən böyük sosial paketin həyata keçirilməsinə başlanılıb.
Bəhs olunan sorğu zamanı Prezident İlham Əliyevin kadr islahatları ilə bağlı sualları cavablandıran respondentlərin 78,8%-i həyata keçirilən kadr siyasətinə birbaşa öz müsbət rəyini bildirib. Şübhəsiz ki, Prezident İlham Əliyevin son bir ildə həyata keçirdiyi struktur və kadr islahatları idarəetmənin səmərəliliyinin artırılması baxımından mühüm əhəmiyyətə malikdir. Ekspertlərin də qeyd etdikləri kimi, Azərbaycanda həyata keçirilən struktur islahatları dərin hüquqi və institusional islahatların davamı kimi xüsusi önəm kəsb etməklə yanaşı, həm də idarəetmənin optimallaşdırılmasına xidmət edir.
Sözügedən sorğuda rəyi soruşulanların 75,6%-nin korrupsiyanın aradan qaldırılması ilə bağlı görülən tədbirləri effektli və qənaətbəxş qiymətləndirməsi də təsadüfi xarakter daşımır. Sirr deyil ki, ölkəmizdə korrupsiya və rüşvətxorluğa qarşı mübarizə dövlət siyasətində prioritet istiqamətlərdən biri kimi müəyyənləşdirilib, bu istiqamətdə ardıcıl, sistem xarakterli və kompleks tədbirlər həyata keçirilir. “ASAN xidmət” modelinin uğurla tətbiq olunması, vergi, gömrük, sosial və digər idarəçilik sahələrində məqsədyönlü tədbirlərin reallaşdırılması bu kontekstdə mühüm əhəmiyyətə malikdir. Bütün bu tədbirlər şəffaflığın yüksəldilməsi, dövlət büdcəsinin gəlirlərinin artması və bir çox əhəmiyyətli məsələlərin həlli baxımından xüsusi önəm kəsb edir.
Bunlarla yanaşı, “OpinionWay”in “İlham Əliyevin qəbul etdiyi “Regionların sosial-iqtisadi inkişaf proqramı” və hökumətin bölgələrdə həyata keçirdiyi fəaliyyət nəticəsində, sizcə, regionlar inkişaf edibmi?” sualına respondentlərin 93,1%-i “hə” cavabı verib. Məlumdur ki, ölkəmizdə Prezident İlham Əliyevin rəhbərliyi ilə həyata keçirilən uğurlu siyasət nəticəsində bütün sahələrdə tarixi əhəmiyyətə malik olan möhtəşəm nailiyyətlər əldə olunub. Təbii ki, dinamik tərəqqi Azərbaycanın bölgələrini də əhatə edib, regionların sosial-iqtisadi inkişafı davamlı xarakter alıb. Respublikamızda regionların sosial-iqtisadi inkişafına dair əvvəlki iki Dövlət Proqramı kimi, 2014-2018-ci illəri əhatə edən sayca üçüncü proqramın da icrası yüksək səviyyədə təmin olunub və Prezident İlham Əliyevin 29 yanvar 2019-cu il tarixində imzaladığı növbəti Fərmanla “Azərbaycan Respublikası regionlarının 2019-2023-cü illərdə sosial-iqtisadi inkişafı Dövlət Proqramı” təsdiqlənib. Hazırda müvafiq Dövlət Proqramı çərçivəsində müəyyən olunmuş işlər müvəffəqiyyətlə davam etdirilir. Bütün bunlar isə, şübhəsiz ki, regionların sosial-iqtisadi inkişafının davamlı xarakter daşıdığını göstərir. Vurğulamaq gərəkdir ki, Prezident İlham Əliyevin regionların inkişafına xüsusi diqqət göstərməsi həm də vətəndaşların böyük rəğbətini qazanıb. Sorğuda ölkə Prezidentinin bölgələrə çoxsaylı səfərlərinin faydalılıq əmsalı respondentlərin 90,4%-i tərəfindən müsbət dəyərləndirilib. Şübhəsiz ki, Prezident İlham Əliyevin təkcə keçən il Azərbaycanın bölgələrinə 24 səfər etməsi, vətəndaşlarla birbaşa ünsiyyətdə olması, yerlərdə əhali ilə görüşləri, problemlərlə şəxsən tanış olması, onların qısa zamanda aradan qaldırılması və digər məsələlər bu sorğunun göstəricilərini şərtləndirən mühüm amillərdir.
Bunlarla yanaşı, sorğunun Prezident İlham Əliyevin xarici siyasəti ilə bağlı nəticələri də əhalinin pozitiv mövqeyini ifadə edib. Sorğuda iştirak edənlərin 89,9%-i bu sualı müsbət cavablandırıb, onların 73,9%-i suala “əla” cavabını verib. Bu, bir həqiqətdir ki, milli maraqlara əsaslanan müstəqil xarici siyasət kursuna malik olan Azərbaycanın müasir beynəlxalq münasibətlər sistemində mövqeyi mütəmadi olaraq möhkəmlənir. Prezident İlham Əliyevin rəhbərliyi ilə həyata keçirilən çoxvektorlu və praqmatik xarici siyasət sayəsində ölkəmiz həm ikitərəfli münasibətlər, həm də beynəlxalq təşkilatlar çərçivəsində səmərəli və qarşılıqlı faydalı əməkdaşlıq əlaqələrini uğurla davam etdirir. Hazırda regional güc mərkəzi olan, bölgədə sabitləşdirici aktor kimi çıxış edən Azərbaycan müasir beynəlxalq münasibətlər sistemində etibarlı tərəfdaş kimi tanınır və dünyada böyük etimad qazanıb. Ölkəmiz xarici siyasətində milli maraqlar və beynəlxalq hüquq normaları ilə yanaşı, sülh, sabitlik, inkişaf, qarşılıqlı faydalı əməkdaşlıq kimi meyarları da əsas götürür, beynəlxalq münasibətlər sisteminə yeni və daha mütərəqqi dəyərlər təqdim edir. Bunlara paralel olaraq Azərbaycan, eyni zamanda, beynəlxalq miqyasda əməkdaşlıq və təhlükəsizlik məsələlərinə xüsusi diqqət yetirir. Sadalananların fonunda ayrı-ayrı milli dövlətlər, o cümlədən dünya siyasətinin güc mərkəzləri kimi çıxış edən ölkələr Azərbaycanın beynəlxalq münasibətlər sistemində fəal rolunu, praqmatik xarici siyasət kursunu yüksək qiymətləndirirlər. Eyni zamanda, respublikamızla müxtəlif sahələri əhatə edən əlaqələrin inkişafına xüsusi əhəmiyyət verilir. Bütövlükdə, dünyada böyük etimad qazanan Azərbaycanın strateji tərəfdaşlıq əlaqələri güclənir, dostlarının və tərəfdaşlarının sayı artır.
Nəticə etibarilə, Fransanın “OpinionWay” şirkətinin bu ilin mart ayında ölkəmizdə keçirdiyi rəy sorğusu Prezident İlham Əliyevin yenə də Öz seçicilərinin yüksək etimadına malik olduğunu təsdiq etdi. Başqa sözlə, sorğunun nəticələri dövlət başçısının seçicilərin etimadını artıqlaması ilə doğrultduğunu, Azərbaycan xalqının Prezident İlham Əliyevin son bir ildə fəaliyyətini yüksək qiymətləndirdiyini göstərir. Eyni zamanda, sözügedən sorğunun əks etdirdiyi reallıqlardan biri budur ki, Azərbaycan xalqı Prezident İlham Əliyevin milli maraqlara söykənən siyasətini tam dəstəkləyir, bu gün seçki keçirilərsə, cənab İlham Əliyev seçicilərin 83-85 faizinin səsini qazana bilər.
Nurlan QƏLƏNDƏRLİ

Paylaş:
Baxılıb: 458 dəfə

Xəbər lenti

Hamısına bax

Xəbər lenti

Ədəbiyyat

Analitik

Siyasət

Xəbər lenti

Xəbər lenti

Sosial

Bayram sonrası....

28 Mart 11:23

Arxiv
B Be Ça Ç Ca C Ş
1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31